Acara Arisan (Bahasa Batak) – disadur dari Buku Ibadah Harian edisi Maret – April 2015


PARTORDING NI PARTANGIANGAN PUNGUAN (ARISAN)
KELUARGA/MARGA/PARSAHUTAON (HATA BATAK)

1. Pangaradeon
2. Joujou tu Parsaoran dohot Debata
U : Hamuna angka dongan sapunguan. Sadarion Partangiangan ni Punguanta, alani i, denggan ma tapahibul roha dohot pingkiranta marsomba tu Debata Parasiroha i, on do tahe na pinangido ni Debata.
H : Ro ma hamu tu Debata pasahathon hata hamuliateonmuna. Pardenggan basa jala partanobatoanta do Ibana ro di saleleng ni lelengna.
U : Lobi sian i tahe, tapasahat ma ngolunta tu Ibana, asa pararon ni Debata tingkinta, gogo dohot parsitutuonta marhite punguan on.
H : Haposan do Debata manangannangan angka na ro jala na biar mida Ibana. Jahowa do paradehon tingki di angka ulaonta, jala Ibana do mambahen manjadi ulaonta.
U : Jahowa do mambahen las ni roha, nda tama itapuji Ibana? Ala ni i, sian haburjuonta dohot girgir ni rohanta, itapasangap ma Ibana, marende ma hita!

03. Marende BE-9 : 1, 3 “Hupuji holong ni”

Hupuji holong ni rohaMu, o Tuhan Jesus Rajangki. / Tu Ho hulehon ma tondingku, ai i do pinangidoMi. / Huhalupahon ma diringku, mamingkir holong ni rohaMu.

Huhilala ingkon martuhan, ingkon mangolu au di Ho. / Ndang jumpang au be hangoluan aut unang dipatupa Ho. / Sai Ho do paradiananhu, sai gok di Ho nama langkangku.

04. Invocatio
U : Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on.
H : Amen.
U : Halleluya! Puji hamu ma Debata di bagasan habadiaonna i, puji hamu ma ibana di hajanghajang ni hagogoonna i!
H : Puji hamu ma Ibana ala hagogoonna, angka na sumurung i, puji hamu ma Ibana, hombar tu hinagodang ni hatimbulonna.
U : Puji hamu ma Ibana mardongan soara ni sarune, puji hamu ma Ibana mardongan arbap dohot sordam.
H: Puji hamu ma Ibana mardongan tali sajak dohot panontoron na marliat, puji hamu ma Ibana mardongan hasapi dohot tulila!
U : Puji hamu ma Ibana mardongan ogung panggora, puji hamu ma Ibana mardongan ogung panonggahi! Sude na marhosa ingkon mamuji Jahowa! Halleluya!
Martangiang ma hita: Ale Tuhan Debata, na marpungu do hami dibagasan punguan na pinajongjongMon, mandok mauliate do rohanami tu Ho ai tongtong do diiringiring Ho hami sahat tu sadari on. Ale Tuhan, ndang adong sipangasahononnami di taon on, ia so holan pangurupion dohot panogunoguonMu di hami. Antong, i do na hupangido hami sian Ho di na marsaor hami dohot Ho di partangiangan on, asa urupi jala togutogu hami mandalani ngolunami marhitehite Tuhan Jesus Kristus Tuhannami. Amen.

05. Marende BE-149 : 1, 3 “Ho tongtong ihuthononku”

Ho tongtong ihuthononhu, Jesus sipangolu au. / Tung na so tadinghononhu Ho na paluahon au. / Sian sasude dosangku, dohot sian uhum i. / Na tongtong habiaranhu, ala pardosaonhi.

Manang aha pe na masa, las ni roha arsak pe. / Tioponhu Ho na basa na marholong roha pe. / Tung saleleng au mangolu, nang dung suda bohalhon. / Ingkon Ho, o Sipangolu, pujionhu sai tongtong.

06. Manghatindanghon Habasaon ni Debata (Psalm 112:1-9)
U : Martua ma baoa na mangkabiari Jahowa, na lomo roha situtu di angka patikna!
H : Sangap ma pinomparna i sogot di tano on, dapotan pasupasu ma sundut ni angka partigor sogot.
U : Hamoraon marlobilobi di bagasan jabuna, jala hot do hatigoranna i ro di saleleng lelengna.
H : Sai binsar do di partigor i hatiuron di haholomon, sian Ibana pardengganbasa, parasi roha jala na bonar. Mardohar ma baoa na asi roha dohot na pasalihonsa, tarondolhonsa ma angka hatana di paruhuman.
U : Ndang tagamon humordit ibana salelenglelengna, marbarita salelenglelengna do partigor i.
H : Ndang tagamon mabiar ibana binahen ni barita hinamago, nalom do rohana marhaposan tu Jahowa.
U : Marsitiopan do rohana, ndang mabiar ibana, paima idaonna pamaloson tu angka alona i.
H : Manaburi ibana, mangalehon tu angka na pogos, hot do hatigoranna i ro di salelenglelengna, timbul ma tandukna sogot di bagasan hamuliaon.
U : Martua do angka na tumangihon Hata ni Debata jala na umpeopsa, Amen.

07. Marende BE-815 : 2, 3 “Uli do tingki na hohom”

Uli do tingki na hohom, sonang martua rohangkon. / Tongtong masihol rohangkon, lao martangiang na hohom. / Au raphon na badia i, sai naeng marnida bohiMi / Tuhanhu sipartobus i, di tingki martangiang i.

Uli do tingki na hohom pasahat pangidoanhi. / Tu Debata na bonar i sitangihon tangiang i. / Di na huida bohiMi, porsea au di hataMi. / Tompas holso ni rohangki, di tingki martangiang i.

08. Tangiang Pangondianon

09. Marende BE-719 : 1 “Hubege soaraM o Jesus”
Hubege soaraM o Jesus, hubege soaraM o Jesus, / hubege soaraM o Jesus na manjouhon ihuthon ma au. / Reff. Togu au Jesus Tuhanku, iringiring ma langkangku, / patuduhon ma dalanMu asa unang, unang lilu au.

10. Renungan (Jamita Singkat)

11. Marende BE-672 : 3 “Tung godang situtu ulaon”
Ala ni i boan ma sondang na tiur i, boan ma hata ni Tuhan i. / Sai urupi na pogos, na mardangol i asa ro tu Jesus Tuhanta i. / Sai patupa ma i ala ni Tuhani, so manghirim balosna tu ho / Debata do marnida na ni ulami manang na adong parbue ni i.

12. Tangiang Ale Amanami, Pasupasu dohot Amen.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s