Disadur dari Buku Ibadah Harian, Edisi Juli – Agustus 2018

1. Marende BE No. 115:1+3. “Tuhan Debata”
Tuhan Debata, sai ramoti ma
Daging dohot tondinami, ido pangidoannami
Sai pahipas be, hami on sude
Sai parbadiai, sai tongtong rajai
Ale Tondi Parbadia, rohanami asa ria
Mangoloi hataM, hombar tu rohaM

2. Votum-Introitus-Tangiang. (L= Liturgis & R= Ruas)
L. Marhitehite goar ni Debata Ama dohot goar ni Anakna Tuhan Jesus Kristus dohot goar ni Tondi Parbadia natumompa langit dohot tano on,
R. Amen.
L. Marolopolop ma hamu, ale angka partigor, mangasahon Jahowa talup do marende angka unjur marroha. Marlas ni roha ma hamu, ale angka partigor dibagasan Jahowa, jala puji hamu ma goarNa na badia i.
R. Sai pujionku do angka pambahenan ni Jahowa, sai ingotonhu do halongangan angka na binahenNa i sian na robi.
L. Na denggan situtu do na mamuji Jahowa dohot mengendehon goarMu, ale na tumimbul. Mamaritahon asi ni rohaM manogotna i dohot hasintonganMi bornginnai.
R. Oloi hamu ma Jahowa marhitehite las ni roha, ro be ma hamu tu joloNa marhitehite olopolop. Ai pardenggan basa do Jahowa, ro disaleleng ni lelengna do asi ni rohaNa, jala marsundutsundut do hasintonganNa. Haleluya !
L. Martangiang ma hita. Mauliate dipasahat rohanami tu Ho Debata Amanani, ala asi dohot holong ni rohaM na mandongani jala mangaramoti daging dohot tondinami. Diloas Ho do hami marpungu jala marlas ni roha sadari on. Ale Tuhan, ramoti jala horasi ma hami saluhutna, sai tompa ma roha na ias jala na ringgas dibagasan rohanami be. Sai parrohai ma hami mamilangi ariari ni ngolunami asa dapotan roha bisuk hami. Jalo ma tangiangnami marhitehite Jesus Kristus Tuhannami. Amen.

3. Marende BE No. 194 : 2 “Aut so asi rohaM”
Mauliate ma di Ho, o Debata, ala basaM
Sibahen dalan i, marhite AnakMi, tu banuaM

4. Pujipujian ala asi ni roha ni Debata
L. Ale Debata, Amanami marhite Jesus Kristus Tuhannami, Hupuji hami ma goarMu nabadia i. Ala jumolo Ho manghaholongi hami. Balga nai panumpakMu, ale Tuhan, molo dilehon Ho bagas on gabe inganannami, hupangido hami ma tu Ho, pasupasu jala mian ma Ho ditongatonga ni bagas on, asa lam tu balgana holong ni rohanami laho mangihuthon Ho. Songon partubu ni hau dohot bunga na di topi ni sunge, songon i ma nian partubu ni holong ni pangisi ni bagas on.
R. Ale Debata parholong roha, mauliate ma di asi ni rohaM
L. Ale Debata, Ho do marsuru surusuruanMu tu undungundung ni si Abraham so pamotoanna, laho pasahat pasupasuM. Hupangido hami ma, paloas ma keluarganami saluhutna gabe keluarga sitiruon, na girgir mangalehon dohot mangurupi angka na hurangan, mangurupi na pogos jala na so marama so marina.
R. Ale Debata na gabe jolma, hupuji hami Ho ala dipatupa Ho do las ni roha di hami, sai lam tambai ma i di ngolunami be.
L. Huparhatopot hami do ale Debata, saluhutna do manumpak tu na denggan diangka na marholong roha di Ho. Ala ni i, sai baen ma rohanami gabe inganan ni Tondi Parbadia asa boi hami masihaholongan, marsisarion, jala inganan las ni roha.
R. Ale Debata parasiroha na sumurung, mian ma Ho di tongatonganami!
L. Huparhatopot hami do, ndang adong di son huta na hot dihami. Alai dipaloas Ho do hami mangingani bagas on paima sahat hami tu inganan na pinaradeM. Urupi ma hami laho mandok mauliate tu Ho. Asa hupelehon hami peleannami marhitehite ma mangaradoti ulaon lomo ni rohaM dibagas on.
R. Pujionnami ma Ho marsundut-sundut jala pajojoronnami ma saluhut denggan ni basaM.
L. Pasupasu ma hami saluhutna, ingani ma roha dohot pingkirannami, ala Anak haholongan ni rohaM, Tuhan Jesus Kristus Tuhannami.
L+R. Amen.

5. Tangiang Pangondianon

6. Marende BE No. 262:1. “Jahowa Tuhanki”
Jahowa Tuhanki, Ho mual ni na denggan
Sitompa sasude, silehon hangoluan
Sai lehon ma di au, pamatang na hipas
Maringan ma di au, baen roha na ias

7. Jamita:

8. Marende BE No. 581:1– “Sangap Di Jahowa” (P. Pelean)
Sangap di Jahowa na Sun timbul i, Balga ni holongNa ndang tarasam i,
Di lehon AnakNa na sasada i, manobus hita jolma pardosa i
Puji ma Debata ale manisia, Las roham, las roham, somba ma Debata
Dapothon Jahowa na sun timbul i, Marhite AnakNa Tuhan Jesus i
Tung so hasuhatan do basaNa i, Marhite AnakNa ni lehonNa i
MudarNa durus do di hau silang i, Rara pe dosanta ias dibaen i.
Puji ma Debata ale manisia, Las roham, las roham, somba ma Debata
Dapothon Jahowa na sun timbul i, Marhite AnakNa Tuhan Jesus i

9. Tangiang Panutup: Ale Amanami + Pasupasu.